ភ្នំពេញ៖ ប្រធានាធិបតីចិនលោក ស៊ី ជិនពីង (Xi Jinping) បានផ្ញើសារអបអរសាទរប្រធានគណបក្សប្រជាជនកម្ពុជា សម្តេចតេជោ ហ៊ុន សែន ដែលគណបក្សបានទទួលបានជ័យជំនះជាថ្មីម្តងទៀតក្នុងការបោះឆ្នោតជ្រើសតាំងតំណាងរាស្រ្ត អាណត្តិទី៧ កាលពីថ្ងៃទី២៣ ខែកក្កដា ឆ្នាំ២០២៣។

ក្នុងលិខិតអបអរសាទរចុះថ្ងៃទី២៥ ខែកក្កដា ឆ្នាំ២០២៣ លោក ស៊ី ជិនពីង បានលើកឡើងថា ជ័យជម្នះថ្ងៃទី២៣ ខែកក្កដា បង្ហាញថាក្រោមការដឹកនាំរបស់សម្ដេចតេជោ ហ៊ុន សែន បានធ្វើឱ្យប្រទេសកម្ពុជាសម្រេចបាននូវស្ថិរភាពនយោបាយ សេដ្ឋកិច្ច ការអភិវឌ្ឍ ជីវភាពស្ដង់ដារ និងមានកេរ្តិ៍ឈ្មោះទាំងនៅលើឆាកអន្តរជាតិ និងក្នុងតំបន់។ ជាមួយគ្នានេះលោកប្រធានាធិបតីបន្ថែមថា ប្រទេសចិននឹងបន្តគាំទ្រប្រទេសកម្ពុជាឱ្យបោះជំហានអភិវឌ្ឍន៍បន្តទៀតផងដែរ។

លោកបញ្ជាក់ថា៖ «ចិន និងកម្ពុជា គឺជាសហគមន៍មួយដែលមានអនាគតរួម។ គណៈកម្មាធិការមជ្ឈិមនៃគណបក្សកុម្មុយនិស្ដចិន បានផ្សារភ្ជាប់យ៉ាងមានសារៈសំខាន់ នៅក្នុង កិច្ចសហប្រតិបត្តិការប្រកបដោយមិត្តភាព ជាមួយគណៈកម្មាធិការកណ្ដាលនៃគណបក្សប្រជាជនកម្ពុជា។ ខ្ញុំបានត្រៀមខ្លួនរួចជាស្រេចដើម្បីធ្វើការជាមួយ សម្ដេចប្រធាន ដើម្បីពង្រឹងឱ្យកាន់តែស៊ីជម្រៅនូវការផ្ដោះប្ដូរ និងកិច្ចសហប្រតិបត្តិការវាងភាគីទាំង២ និងនៅគ្រប់វិស័យសំដៅចូលរួមជាមួយគ្នាក្នុងការកសាង សហគមន៍ចិន-កម្ពុជាប្រកបដោយគុណភាពខ្ពស់ កម្រិតខ្ពស់ និងស្ដង់ដារខ្ពស់ ភ្ជាប់ជាមួយអនាគតរួមនៅក្នុងយុគសម័យថ្មី ដើម្បីផលប្រយោជន៍នៃ ប្រទេសទាំង២ និងប្រជាជននៃប្រទេសទាំង២»។

ក្រោយការបោះឆ្នោតថ្ងៃទី២៣ ខែកក្កដា ឆ្នាំ២០២៣ យោងតាមលទ្ធផលបណ្ដោះអាសន្នឃើញថាគណបក្សប្រជាជនកម្ពុជាដឹកនាំដោយសម្ដេចតេជោទទួលបានសំឡេងគាំទ្រជាច្រើនពីពលរដ្ឋដែលមានសិទ្ធិបោះឆ្នោតដែលធ្វើឱ្យគណបក្សអាចគ្រប់គ្រងអាសនៈ១២០ លើ១២៥អាសនៈនៅក្នុងរដ្ឋសភកម្ពុជា៕